Friday, May 10, 2013
الإعتمادات المستندية بصورة مبسطة
Posted by Unknown at 5:08 PM
- اعتمادات مستندية بالبلدي
في البداية تعالو نحكو مع بعض حكاية الاعتمادات المستندية بالبلدي كده
يعني ايه اعتماد مستندي وليه بنفتحه وايه معالجته المحاسبية؟
نفترض مع بعض ان في شركة حبت تشتري بضاعة من شركة في بلد تانية وطبعا مش ضامنة المورد يبعتلها البضاعة بتاعتها لو سددتله تمنها او يبعتهلها البضاعة بس بمواصفات تختلف عن اللي هي طلبتها وفي نفس الوقت المورد اللي بيبيع مش ضامن الشركة اللي بتشتري لو بعتلها البضاعة حتسدد تمنها ولا لا في الحالة دي بيكون الحل هو الاعتماد المستندي
وهو حكايته باختصار كده ان الشركة اللي عايزة تشتري بتروح للبنك بتاعها وتطلب منه يفتحلها اعتماد مستندي بناء علي فاتورة مبدئية من المورد يقوم بنك المشتري يخاطب بنك المورد البائع ويبعتله شروط الاعتماد اللي اتفتح عنده ويطلب منه ان يرسله مستندات شحن البضاعة وفقا للشروط المتفق عليها مقابل ان هو يحوله قيمة الاعتماد بعد استلامه مستندات الشحن طبعا المشتري بياخد مستندات الشحن من بنكه وبكده بيكون ضمن ان البضاعة اتشحنت بالمواصفات اللي في الاعتماد وفي نفس الوقت البائع ضامن فلوسه عشان البنك بيضمن المشتري طيب ايه المعالجة المحاسبية للاعتماد؟؟
بنفتح حساب اعتماد مستندي عندنا وهو حساب طبيعته اصل وبنرمي عليه كل مصروف اتصرف علي الاعتماد بدايه من مصاريف البنك لفتح الاعتماد وفاتورة المورد اللي هي قيمه البضاعة وقيمة الشحن البحري والتخليص والجمارك ونولون النقل وكل قرش بيتصرف علي البضاعة عشان توصل مخزني
وبيكون القيد
من ح اعتمادادات مستندية الي ح / المورد – او شركة التامين – او خط النقل البحري – او الجمارك او ايا كان الطرف الداين هو ايه
طيب دلوقتي البضاعة وصلت عندي ومحتاج اقفل حساب الاعتماد ده؟
بيكون عندي حالتين يا الاعتماد جي ببضاعة مخزون في الخاله دي بقول من ح / المخزون- بكل تكلفه الاعتماد
الي ح/ الاعتماد المستندي
او يكون البضاعة اصل ثابت وفي الحالة دي بقول من ح/ الاصول
الي ح / الاعتماد المستندي
طيب لو السنة انتهت والاعتماد لسه متقفلش والبضاعة لسه موصلتش؟
في الحاله دي بيظهر معايا في جانب الاصول في المركز المالي تحت بند بضاعة في الطريق لو هو مخزون او ح اعتمادات مستندية لشراء اصول لو هو لشراء اصل وفي الحالتين هو حساب اصول بيظهر في قائمة المركز المالي بالتكلفة اللي وصل ليها في وقت اعداد القوائم
الدرس مشاركة من الاستاذ/ أحمد خليفة
Subscribe to:
Post Comments (Atom)
1 comments:
برنامج حسابات
تضبط به حسابات مؤسستك مهما كان نشاط عملك تجاريا او صناعيا لذلك اختارنا لك مجموعة متكاملة من الانظمة المحاسبية التى تخدم كافة المجالات ومن هذه الانظمة
برنامج حسابات ومخازن
برنامج الصيدليات
برنامج كاشير
Post a Comment