Friday, April 19, 2013


الدورة المستندية للمخازن

مينفعش تبقى محاسب ومتعرفش مخزن شركتك ماشى ازاى وايه الورق بتاعه ومين يطلب ومين يصرف وإيه الدورة المستندية الخاصة بيه
هنا هشرحلك بصورة مبسطة مثالين الأول على الدورة المستندية للمخازن فى  شركة تجارية والثانى الدورة المستندية للمخازن فى  شركة صناعية
اها نسيت ممكن تكون فى شركة تجارية معندهاش مخازن لكن الشركة الصناعية مستحيل

اولا الشركة التجارية :
الدورة المستندية للمخازن فى الشركة التجارية 
الشركة التجارية بتبيع منتج تام على طول يعنى مبتصنعش شئ بتشترى جملة وتبيع تجزئة يعنى الموضوع ساهل بالنسبة للمخازن
الدورة هنا بتبدى لما نشترى بضاعة والمخزن يستلمها ويعمل حاجة إسمها إذن إضافة للمخازن
ولو فى حاجة مش عايزها بيعمل بيها إذن مرتجع للمورد
علشان يرجعها من عنده للمورد

بعد كده محاسب العملاء بيرحلوا عميل عايز بضاعة بيروح عامله فاتورة وعامل معاها
إذن تسليم بضاعة وطبعا بيخلى الاصل عنده وبيدى العميل صورة بيروح بيها المخازن
والمخزن يستلم الصورة دى يروح عامل إذن صرف بضاعة للعميل
وطبعا نفس المرتجع لو رجع حاجة
يبقى المخزن بيضيف وبعدين يستلم امر بالتسليم وبعدين يصرف
ويعمل كارت صنف يسجل فيها الصادر والوارد علشان فى اى وقت يعرف الرصيد كام عنده "جرد مستمر"
يعنى من الاخر الدورة للشركة التجارية
بتبتدى من
1- إذن إضافة بضاعة (لما تيجيلنا بضاعة جديدة)
2- إذن تسليم بضاعة ( بيعملوا المبيعات للمخازن علشان يصرف بالكمبة المكتوبة)
3- إذن صرف بضاعة ( بيعملوا امين المخزن علشان يثبت انه صرف بضاعة)
4- إذن مرتجع بضاعة لو مطلوب
وفى إذن تانى هنقولوا فى اخر الدرس ده
ومتنساش كارت الصنف
ثانيا الشركة الصناعية :
الدورة المستندية فى الشركة الصناعية 
ودى بقى بتتقسم لمخزنين مخزن مستلزمات إنتاج ومخزن منتج تام
نبدا من المنتج التام وده هو هو الشركة التجارية بس البضاعة الجديدة بتيجى من التصنيع

بتبتدى من
1- إذن إضافة بضاعة (لما نصنع بضاعة جديدة ونسلمها للمخزن )
2- إذن تسليم بضاعة ( بيعملوا المبيعات للمخازن علشان يصرف بالكمبة المكتوبة)
3- إذن صرف بضاعة ( بيعملوا امين المخزن علشان يثبت انه صرف بضاعة)
4- إذن مرتجع بضاعة لو مطلوب

والمخزن التانى مخزن مستلزمات الإنتاج :
وده مثلا مخزن بنحط فيه المواد الخام الشحوم العدد إلخ
طيب وده بيمشى إزاى

اولا القسم اللى عايز حاجة مثلا شركة بتصنع عصير فى قسم التغليف عايز علب كرتون بيروح لمهندس الإنتاج يقوله عايز علب من المخزن ويعمل طلب صرف بضاعة من القسم للمخزن بيعتمده مهندس الانتاج الأول.
وبعدها المخزن بيصرفله اللى هو عايزه طبعا إذن صرف بضاعة والباقى زى ما هو مرتجع لو فى طبعا مش اوامر تسليم لانه ده داخلى جوا المصنع يعنى
ونلخصه كالتالى
1- إذن إضافة بضاعة (لما نشترى مواد خام ونسلمها للمخزن )
2- طلب صرف بضاعة ( بيعملوا الاقسام المختلفة ويعتمدوه من مهندس الانتاج )
3- إذن صرف بضاعة ( بيعملوا امين المخزن علشان يثبت انه صرف بضاعة)
4- إذن مرتجع بضاعة لو مطلوب
5- وزى ما قولنا فوق لما يخلصوا المنتج هيسلموه للمخزن ويعمل إضافة
وطبعا كل واحد نسخة من كل ورقة علشان يثبت اللى صرفه او اللى خده
وطبعا الكارت الصنف بس مش فى كل حاجة المواد الخام اه " جرد مستمر" لكن لو حاجة زهيده او عدد وادوات مش بنجيبها بصورة مستمرة مبنعملهاش كارت "جرد دورى"


ويفضل ورقة اسمها
إذن تسويه وده بيتعمل فى حالة العجز او الزيادة لرصيد المخزن بعد محاسبة المسئول وده بيسمح بيه المدير المالى او رئيس الحسابات
ده كل حاجة طبعا ممكن تلاقى ورق تانى بس ده الاساس
وطبعا ممكن المسميات تختلف يعنى بدل امر تسليم ممكن امر صرف بس المعنى واحد
وبكده نكون شرحنا الدورة المستندية للمخازن بشكل مناسب ومبسط لكل المهتمين بالموضوع 

2 comments:

mohammad rashad said...

شكرا جزيلا على المعلوملت القيمة
انا بجاجة الى مستندات الدورة المحاسيبة بمخازن الشركات الصناعية

mohamed ragab said...

استاذ محمد رشاد
راجع الموضوع التالى

http://accountants-club30.blogspot.com/2013/04/blog-post_27.html

Post a Comment