Saturday, April 20, 2013
مقدمة فى محاسبة التكاليف
Posted by Unknown at 3:02 PM
التكاليف كما لم تدرسها من قبل
كلنا عارفين ان تكلفة اى منتج تتكون من مواد مباشرة واجور مباشرة وتكاليف صناعية غير مباشرة
وبرضه عارفين ان التكاليف الصناعية غير المباشرة بتتكون من مواد غير مباشرة واجور صناعية غير مباشرة واهلاك وصيانة وحاجات كتير كده
وعلشان تحسب تكلفة اى منتج بتاخد التكلفة الصناعية بس " ليه"
... سببين الاول وده العادى واللى كل الناس هتشرحولهك لان المنتج لازم ياخد مواد " كلام صح" ولازم ياخد اجور " علشان يتنتج" بس مش لازم يكون فى محاسب علشان انت " علشان كده بناخد الاجور المباشرة "
والاجور غير المباشرة دى زى اجر مهندس الانتاج ومهندس الصيانة امن المصنع ومسئولين السلامة المهنية يعنى كل اللى بيشتغل جوا المصنع
يعنى كل التكاليف اللى بتدخل فى الانتاج يعنى بتشيل كل التكاليف الادارية والتسويقية " سواء مواد او اجور "
والسبب التانى " لا نخليه فى الاخر"
نعرف الاجور المباشرة بقى : دى اجور عمال الانتاج بس " بس بس بس " يعنى العامل اللى واقف على خط الانتاج
طيب الاجور غير المباشرة : دى كل الاجور الصناعية غير الاجور المباشرة طبعا وتتضمن مهندسى الانتاج والصيانة وامن المصنع والمساعدين ورؤساء الاقسام وغيرها
الاجور الادارية والتسويقية : دى مبنخدهاش فى تكلفة المنتج ودى زى اجور رجال البيع والتسويق والمحاسبين وشئون الافراد
نروح للمواد المباشرة : ودى المواد اللى بتدخل فى عملية الانتاج طوالى ويمكن تتبعها " بلاش كلام كبير وحياة ابوك" يعنى من الاخر زى ما تقول كده انا هصنع كرسى يبقى المادة المباشرة خشب ليه ؟؟ هقدر اقول الكرسى خد اد ايه خشب يعنى اقدر اقسم الخشب على عدد الكراسى بالضبط
اما المواد الغير مباشرة : ودى فى المثال السابق زى الغراء مثلا والمسامير مش معقول هبص للكرسى اقولك دا واخد كام جرام غراء يعنى بالنظر وهكذا
يبقى الفرق بين المواد المباشرة والغير مباشرة ان المواد المباشرة ذات قيمة كبيرة ويمكن تقسيمها بسهولة على المنتج و الغير مباشرة العكس
اها زيوت الماكينات برضه مواد غير مباشرة " مش بتدخل فى الصناعة" وطبعا الاوراق والاقلام للادارة مبتدخلش " ما احنا قلنا قبل كده الادارية والتسويقية لا "
وطبعا باقى التكاليف الصناعية الغير مباشرة زى الكهرباء والنور والمياة وكده بناخد اللى بيخص المصنع بس " ودى بتتقسم بمعدلات تحميل هتعرفوها بعدين لما تتقدموا "
احنا خلصنا بس لسه ايه السبب التانى اللى قولنا خليه فى الاخر
ليه بنحسب التكاليف الانتاج بس
اقولك الشركة التجارية بتبيع المنتج التام
والشركة الصناعية بتبيع المنتج التام برضه
تكلفة المبيعات للشركة التجارية المشتريات " ودى منتج تام"
يبقى تكلفة المبيعات للشركة الصناعية هى اللى بتوصل المنتج لحالة التام فقط " يعنى عملية التصنيع نفسها " يعنى بندخل مواد واجور وتكاليف صناعية علشان نطلع منتج بدل ما نشتريه
Subscribe to:
Post Comments (Atom)
0 comments:
Post a Comment